اورمو گولو
یازار : علي وقاري
+0 به يه ن
سايا گلمز طبيعي ثروتلري ايله آذربايجانين قلبينده پارلايان اورمو گؤلو دونيانين ان زنگين قايناقلاريندان ساييلماقدادير. تأسوفلرله كئچن ايللرده موختليف دؤولتلرين غئيري معقول شوعارلارلا ايجرايا قويدوقلاري ايقتصادي، صنعتي و ...سياستلري نتيجه سينده آذربايجانين ايقتيصاد، صنعت و توريسم ساحه لرينده سورونلاري حل اولماديغي حالدا يانليش و تبعيضلرله ياناشي سياستلر آذربايجانين صنعت و تاريخي بينالار و ياشام چئوره سينه آغير خسارتلر يئتيرميشدير.اكو سيستم باخيميندان اورمو گؤلونون اؤنملي رولو و تأثيري دانيلمازدير. كئچن ايللرده اورمو گؤلو كؤرپوسونون قورولماسيندا اوزدن ايراق اؤلكه موتخصيصلرينين تكنيكي و موهنديسي سهولرينين نتيجه سينده بؤلگه نين اكوسيستم و طبيعي قايناقلاري آغير زييانلار گؤرموش دئييلن سهولرين آرديندان بؤلگه نين قيمتلي داش معدنلري و اكينه جك يئرلري تخريب ائديلميشدير. اكوسيستمين پوزولماسي ايله هر ايل اورمو گؤلونون ميلي پاركلاريندا مينلرجه كؤچري قوش و سايير حئيوانلار ياشاملاريني ايتيرير. قيمتلي معدن داشلارينين گؤله دولدورولماسي سويون آخيميني ائتكيله ميش و غئيري اصولي سدلر قاييرماق ايشي گؤزل اورمو گؤلونو بؤيوك فاجيعه ايله اوزلشديرميشدير. بونلا بئله بوگون آذربايجانين ديرلي و دونيانين ان دوزلو گؤللريندن ساييلان اورمو گؤلونون اؤلومونه شاهيد اولوروق.تأسوفلرله بوگونه دك اؤلكه مسئوللاري نين قوردوغو تبليغ ماهيتلي اوتوروم و مراسيملري، ائله جه ده ياشام چئوره سي مؤضوعسو ايله باغلي فعاليت گؤسترن موختليف قروپلارين چاليشمالاري موثبت نتيجه وئرمه ميش و اورمو گؤلو حياتينين سونونا وارماقدادير. بو آرادا شوبهه لي سياستلر واسيطه سييله اؤلكه نين شورانليقلاري آبادلاشديريليب و آذربايجان ايسه شورانليغا چئوريلمكده دير. بو كيمي دردلري ياشاديغيميز حالدا محلي مسووللار اؤزلليكله غربي و شرقي ايالتلري نين ايسلامي شورا مجليسينده اولان ميلت وكيللري اؤز قروپلاري و شخصي منفعتلرينين قورونماسييلا مشقولدورلار.ايندييه دك ايسلامي شورا مجليسينده اولان آذربايجانلي وكيللردن هانكيسي مجليسده اورمو گؤلونون قوروماسي و فاجيعه لي دوروموندان سؤز آچميشدير؟ ايندييه دك غربي، شرقي آذربايجان، اردبيل و زنجان ايالتلرينين مسئوللاريندان هانكيسي اورمو گؤلونون اؤلومونو گؤره رك بو بؤيوك دردين سسيني تهرانين قولاغينا چاتديرماق ايسته ميشدير؟ ال – الوان سئمينارلاردا تلويزيون كميرالاري قارشيسيندا گؤزل سؤزلر دانيشماقلا اورمو گؤلونو اؤلومدن قورتارماق مومكوندور مو؟ گؤزل اورمو گؤلو اؤلدويو حالدا بو و بو كيمي اونلارجا سورغو آذربايجان ميلتيني سارسيتماقدادير.بيلگيلريميزه گؤره ديرلي تيراختور فوتبال تاكيمينين طرفدارلاري گؤزل و لاييق بير ايش گؤرموش و چئوره گونو (13 فروردين) – ده آذربايجان ميلتيندن قيرميزي پارچا و سو بارداقلاري ايله اورمو گؤلو ساحيللرينده حاضير اولماغي ايسته ميشلر. اونلار بو واسيطه ايله اورمو گؤلونون قوروماسي فاجيعه سيني اؤلكه و محلي مسئوللارا چاتديرماق ايسته ييرلر.بيز اورمونون بير سيرا مدني فعاللاري، يازارلار، قزئته چيلر و بيليم يورد اؤيره نجيلري اولاراق تيراختور فوتبال تاكيمي نين طرفدارلارينين موراجيعتيني دستكله يير و بوتون آذربايجان سئورلردن عاييله وي شكيلده فروردين آيينين 13 –ده (چئوره گونونده) ساعات 12 – ده قيرميز پارچالار و سو بارداقلارلا اورمو گؤلونون كؤرپوسو و اطرافيندا حاضير اولوب فرهنگي مراسيملر قورماقلا ياناشي بؤلگه نين تميزلنمه سينده فعال ايشتيراك ائتمه لريني ايسته ييريك. اوميد ائديريك كي بو واسيطه ايله اورمو گؤلونون نجاتي اوغروندا اؤلكه و محلي مسوولاري اويارميش اولاجاغيق.